झापाको दमकमा इजाजत नलिई सञ्चालन गरिएका दर्जनौँ मेनपावर कम्पनीका शाखा कार्यालय बन्द गरेर सम्बन्धित व्यक्तिहरू फरार भएपछि यी शाखामार्फत वैदेशिक रोजगारमा गएका हजारौँ सर्वसाधारण बिचल्लीमा परेका छन् ।
दमक गगरपालिका १० मा शाखा खोलेर बसेका बज्र ह्युमेन रिसोर्सका सञ्चालक गत असोजदेखि कार्यालय बन्द गरेर फरार भएका छन् । त्यस्तै दुई वर्षदेखि शाखा सञ्चालन हुँदै आएको सिग्मा ओभरसिज मेनपावर कम्पनी गत पुसदेखि नै बन्द भएको छ ।
डेढ वर्षदेखि शाखा खोलेको युनाइटेड मेनपावर कम्पनी कार्यालयमा ताला लगाएर गत चैतदेखि यसका सञ्चालक फरार भएका छन् । डेढ वर्षदेखि दमक १२ मा सञ्चालन गरिँदै आएको ओभरसिज इम्प्लोइमेन्ट सर्भिस गत पुसदेखि सम्पर्क बाहिर रहेकामा डेढ महिना अघिदेखि कार्यालयको समेत अत्तोपत्तो छैन ।
दमक ११ मा खोलिएका दियालो मेन पावर र कावेली हृयुमेन रिसोर्ससमेत अहिले अस्तित्वमा छैनन् । सोही क्षेत्रमा रहेको ब्रोड्वे ओभरसिज र त्रिकोण मेनपावरसमेत बन्द भइसकेका छन् । यहाँका अन्य नाम नखुलेका केही मेनपावरका शाखा सञ्चालन भई हाल फरार छन् । दमक क्षेत्रमा मात्र एक दर्जनभन्दा बढी यस्ता शाखा खोलेर सर्वसाधारणमाथि ठगी गरिएको गुनासो छ । यी शाखाहरूको कुनै पनि इजाजतपत्र कार्यालयमा नआएको जिल्ला श्रम कार्यालय झापाका निमित्त शाखा प्रमुख हरिशरण भट्टराईले जानकरी दिनुभयो । शाखा खोल्नका लागि सम्बन्धित मेनपावर कार्यालयको अनुमति लिएर सरकाको वैदेशिक रोजगार कार्यालयबाट अनिवार्य स्वीकृत लिनुपर्ने कानुनी व्यवस्था रहेको छ ।
कानुनमा यस्तो व्यवस्था भए पनि यहाँ खोलिएका उल्लेखित शाखाले कानुनी प्रक्रिया पुरा नगरेको श्रम कार्यालय झापाको भनाइ छ । यस्ता शाखाले तोकिएको भन्दा धेरै पैसा असुलेर काठमाडौँका विभिन्न मेनपावर कम्पनीलाई वैदेशिक रोजगारीमा जान चाहने जनशक्ति आपूर्ति गर्ने गरेका छन् ।
दुईदेखि तीन वर्षको करार अवधिमा वैदेशिक रोजगारमा गएर सम्झौता अनुसारको तलब सेवा सुविधा नपाएका सर्वसाधारणलाई सबैभन्दा पीडा भएको छ । दुई वर्षदेखि सञ्चालन भएका यस्ता मेनपावरका शाखा गत असोजसम्ममा धेरैजसो बन्द भइसकेका छन् । यति धेरै मेनपावरका शाखा बन्द गरेर सम्बन्धित व्यक्ति फरार हुनुले यस व्यवसायप्रति नकारात्मक सन्देश गइरहेको मेनपावर कम्पनी व्यवसायी सङ्घ झापाका अध्यक्ष भानु शिवाकोटी बताउनुहुन्छ । उहाँका अनुसार यस्ता शाखाको वैधानिकताका लागि जिल्लामा नियमित अनुगमन नहुँदा यस्तो गलत प्रवृत्तिको विकास हुँदै गएको छ ।